టూరిజం కోసం కీలక నిర్ణయం.. లక్షద్వీప్‌లో మద్యం అమ్మకాలకు గ్రీన్ సిగ్నల్

కేంద్రపాలిత ప్రాంతమైన లక్షద్వీప్‌లో గత 47 ఏళ్లుగా అమల్లో ఉన్న సంపూర్ణ మద్యపాన నిషేధాన్ని కేంద్ర ప్రభుత్వం ఎత్తివేసింది. పర్యాటక రంగాన్ని ప్రోత్సహించడమే లక్ష్యంగా, నియంత్రిత పద్ధతిలో మద్యం విక్రయాలకు అనుమతినిస్తూ 'లక్షద్వీప్ ఎక్సైజ్ రెగ్యులేషన్, 2026'ను అమల్లోకి తీసుకువచ్చింది. ఈ నూతన నిబంధనలకు రాష్ట్రపతి ద్రౌపది ముర్ము ఆమోదముద్ర వేయడంతో జూన్ 5వ తేదీ నుంచి ఇవి అమలులోకి వచ్చాయి.

ఈ నూతన విధానం కింద లైసెన్సుల ద్వారా మద్యం తయారీ, దిగుమతి, విక్రయాలకు అనుమతి లభించింది. ప్రభుత్వ ఆధ్వర్యంలోని సంస్థలే మద్యం దిగుమతి చేసుకుని విక్రయాలు జరుపుతాయి. విదేశీ మద్యంపై 400 శాతం, బీర్లపై 200 శాతం, వైన్‌పై 80 శాతం మేర భారీగా ఎక్సైజ్ సుంకాన్ని విధించారు. అయితే 21 ఏళ్ల లోపు వారికి మద్యం విక్రయించడాన్ని ప్రభుత్వం నిరోధించింది.

ప్రధానమంత్రి నరేంద్ర మోదీ 2024లో లక్షద్వీప్‌ను సందర్శించిన తర్వాత, ఈ ప్రాంతాన్ని అంతర్జాతీయ స్థాయి పర్యాటక కేంద్రంగా తీర్చిదిద్దేందుకు కేంద్రం ప్రభుత్వం పటిష్ఠ చర్యలు చేపట్టింది. మాల్దీవులు వంటి పర్యాటక దేశాలతో పోటీ పడాలంటే మద్యపాన నిషేధం ఒక ఆటంకంగా మారిందని అధికారులు విశ్లేషించారు. ఈ క్రమంలోనే పర్యాటకులను ఆకర్షించేందుకు ఈ కీలక నిర్ణయం తీసుకున్నారు.

దాదాపు 97 శాతం ముస్లిం జనాభా కలిగిన లక్షద్వీప్‌లో, స్థానిక సాంస్కృతిక మరియు మతపరమైన విలువల దృష్ట్యా దశాబ్దాలుగా మద్యపాన నిషేధం అమలులో ఉంది. ప్రభుత్వ తీసుకున్న తాజా నిర్ణయంపై కొందరు స్థానికులు, సామాజిక సంఘాలు అభ్యంతరం వ్యక్తం చేస్తున్నాయి. ఇది తమ సంస్కృతి మరియు సామాజిక జీవనంపై ప్రతికూల ప్రభావం చూపుతుందని వారు ఆందోళన చెందుతున్నారు. పర్యాటక అభివృద్ధి మరియు స్థానిక సంప్రదాయాల మధ్య సమతుల్యం సాధించే దిశగా ఈ నూతన విధానం ఇప్పుడు ఒక కీలక పరిణామంగా మారింది.